«Болашақ» бағдарламасына құжаттар қабылдаудың аяқталуына дейін 10 күн қалды

«Болашақ» халықаралық бағдарламасы бойынша жетекші шетелдік жоғары оқу орындарына магистратура, докторантура, резидентураға және тағылымдамада түсу үшін құжаттарды қабылдау 14 қазанға дейін Egov.kz мемлекеттік қызметтер порталы арқылы қабылданады. https://egov.kz/cms/ru/services/higher_education/184pass_mon сілтемесіне өтіп, «Болашақ» стипендиясының конкурстық іріктеуіне қатысуға өтінім беруге болады.

Конкурстық іріктеу 2022 жылғы 30 мамыр мен 30 қараша аралығында өтеді. Осы жылы магистратура мен резидентураға 385, докторантураға 60 стипендия, тағылымдамаға -110 бөлінді.

Жалпы биыл «Болашақ» бағдарламасы бойынша басым мамандықтар тізімінде академиялық оқуға 92, тағылымдамадан өтуге 158 мамандық қарастырылған. Еңбек нарығының үрдістерін талдау негізінде осы жылы тізілімге инновациялар, жаңа технологиялар, медицина және өнеркәсіптік инженерия, жаратылыстану ғылымдары саласындағы 40 жаңа мамандық енгізілді. Сонымен қатар олардың 17-сі атауларын кеңейту арқылы бұрыннан бар мамандықтарға енді. Жалпы, басым мамандықтар тізімі техникалық мамандықтармен 30%-ға кеңейтілді.

«Болашақ» халықаралық стипендиясына конкурстық іріктеу 3 кезеңнен тұрады: кешенді тестілеу, Тәуелсіз сарапшылық комиссиясы мүшелерімен жеке әңгімелесу және Шетелде кадрлар даярлау жөніндегі республикалық комиссия отырысында құжаттарды қарау.

Басым мамандықтар тізімі: https://bolashak.gov.kz/kz/mamandytar

Ұсынылатын университеттер тізімі: https://bolashak.gov.kz/kz/zhoo

Қажетті құжаттар тізімі: https://bolashak.gov.kz/kz/zhattardy-alaj-tapsyru-bolady