«Болашақ» түлегі сирек генетикалық ауруларды, Паркинсон ауруы мен деменцияны алдын алу және емдеудің инновациялық әдістерін зерттейді

Отандық ғалым-дәрігер Рауан Қайыржанов сирек аурулардың, сондай-ақ Паркинсон және Альцгеймер ауруларының генетикалық себептерін зерттейді.

Рауан Қайыржанов зерттеу жұмысын 2015 жылы «Болашақ» бағдарламасы арқылы Лондон университетттік колледжінің магистратурасында оқыған кезде бастады. Кейіннен Астана қаласы Ұлттық нейрохирургия орталығында жалғастырды. Онда ғалым сирек неврологиялық аурулары бар пациенттердің ДНҚ үлгілерін жинап, Лондонға тегін генетикалық зерттеулерге жіберіп отырды.

«Болашақ» бағдарламасы арқылы шетелде білім алудың арқасында мен білім-біліктілігімді тереңдетіп қана қоймай, шет елдің мәдениетімен танысып, баға жетпес тәжірибе жинақтадым. Мен әлемнің түкпір-түкпірінен келген адамдармен таныстым, әріптестеріммен және оқытушылармен байланыс орнаттым. Бұл тәжірибе менің мансабым мен оқуыма жаңа мүмкіндіктер ашты», - деп атап өтті «Болашақ» түлегі, Рауан Қайыржанов.

Бүгінде «Болаша» түлегі Лондон университеттік колледжі Неврология институтының ғалымдарымен бірлесіп балаларда сирек кездесетін неврологиялық ауруларды, Паркинсон ауруын, деменцияны, Гентингтон хореясын және т.б. зерттеумен айналысып жүр.

Рауан Қайыржанов ғылыми жетекшісі профессор Генри Хоулденмен бірге Орталық Азияда және Кавказ сыртында ауқымды зерттеулер жүргізді. Олар сирек кездесетін аурулары бар 5 мың отбасына тегін генетикалық сынақтар жасады. Аталған жұмыстың нәтижесінде олар сирек кездесетін ауруларды тудыратын жаңа гендерді тапты.