ХАЛЫҚАРАЛЫҚ БІЛІМ: БЕДЕЛДІ БРИТАНДЫҚ УНИВЕРСИТЕТТЕРМЕН КЕЗДЕСУ

Бүгін, 28 қарашада Халықаралық бағдарламалар орталығының басқарма төрайымы Әлия Оспанова мен Манчестер университеті және Дарем университеті британдық университеттерінің өкілдері арасында кездесу өтті.

Кездесу барысында жоғары білім беру саласындағы ынтымақтастық мәселелері талқыланды. Орталық басшысы Әлия Оспанова «Болашақ» халықаралық бағдарламасына енгізілген жаңалықтар туралы айтып берді.

Айта кетсек, бүгінгі таңда University of Manchester университетінде 13 стипендиат білім алуда: оның ішінде 7 магистрант, 6 докторант. University of Manchester – Ұлыбританияның Манчестер қаласында орналасқан ең танымал ағылшын зерттеу университеті. Ол 1824 жылы құрылды және содан бері ғылыми жетістіктерімен және академиялық зерттеулерімен танымал әлемдегі жетекші университеттердің біріне айналды. Russel Group тобының мүшесі –ол Ұлыбританияның 24 жетекші зерттеу университеттерінің тобы.

Durham University 1832 жылы құрылды. Бұл Ұлыбританиядағы ең көне жоғары оқу орындарының бірі. Бүгінде Durham University-де әлемнің түкпір-түкпірінен 18,000-нан астам студент оқиды. Бүгінгі таңда 4 адам Durham University-де «Химия», «Педагогика», «Мемлекеттік саясат» және «Археология және этнология» мамандықтары бойынша докторантурада оқиды.