МАНЧЕСТЕРДЕ ҰЛЫБРИТАНИЯНЫҢ СОЛТҮСТІК ҚАЛАЛАРЫНДАҒЫ СТИПЕНДИАТТАР ЖИНАЛДЫ

Манчестерде «Халықаралық бағдарламалар орталығы» АҚ басқарма төрағасы Әлия Оспанованың «Болашақ» бағдарламасының стипендиаттары және ғылыми тағылымдамадан өтушілермен кездесуі өтті.

Әлия Оспанова стипендиаттар үшін жағдайларды жақсартуға бағытталған бағдарламаның маңызды өзгерістерімен таныстырып, әртүрлі процестерді оңайлату жоспарларымен бөлісті. Атап айтқанда, цифрлық платформаларды енгізу және келісімшарттардың толық пакетін онлайн түрде жасау функциясы талқыланды, бұл бағдарлама қатысушыларының Орталықпен өзара әрекеттесуін едәуір жеңілдетуге тиіс.

Манчестер, Престон және Белфаст қалаларындағы стипендиаттар талқылауға белсенді қатысып, бағдарламаның болашағы туралы сұрақтар қойып, өздерінің білім алу және кәсіби өсу тәжірибелерімен бөлісті. Олар өз жобалары үшін маңызды статистикалық деректерге қол жеткізуге мүмкіндік беретін мемлекеттік органдармен бірлесіп зерттеулер жүргізуге байланысты жаңалықтарды оң бағалады. Сондай-ақ, іріктеу конкурсын қайта қарау, оның ашықтығын және сапасын арттыру мақсатында талқыланды.

Стипендиаттар стипендия көлемін ұлғайту мүмкіндігі туралы сұрақтар қойып, инженериядан бастап әлеуметтік ғылымдарға дейінгі түрлі бағыттарды қамтитын зерттеулерінің тақырыптарымен бөлісті, әрі олардың ғылыми қызметін қолдау үшін бағдарламаны одан әрі жетілдірудің маңыздылығын атап өтті.

Манчестер — Қазақстандық стипендиаттар Ұлыбританияның жетекші университеттерінде білім алатын негізгі білім беру және ғылыми орталықтардың бірі. QS рейтингі бойынша 34-орын, THE рейтингі бойынша 53-орын алған University of Manchester-де қазіргі уақытта «Болашақ» бағдарламасының 6 стипендиаты білім алуда.

Университет жаратылыстану және гуманитарлық ғылымдар, инженерия және физика саласындағы бағдарламаларымен танымал. Университеттің профессорлары мен түлектері арасында 25 Нобель сыйлығының лауреаты бар.

Ең танымал жетістіктердің бірі 2004 жылы ғалымдар Андрей Гейм мен Константин Новоселов ашқан графен болып табылады, ол үшін олар физика бойынша Нобель сыйлығын алды. Сондай-ақ университет басқаратын Джодрелл-Бэнк обсерваториясы әлемдегі ең маңызды радиоастрономиялық обсерваториялардың бірі болып табылады.

Стипендиаттармен кездесуден бөлек, Әлия Оспанова University of Manchester өкілдерімен келіссөздер жүргізді, онда ынтымақтастықты одан әрі дамыту мәселелері талқыланды. Келіссөздерде «Болашақ» бағдарламасының стипендиаттарына оқу ақысын тікелей жеңілдіктер ұсыну, ғылыми тағылымдамаларды дамыту және жеңілдікті санаттағы стипендиаттарға шақыру алу мүмкіндігі талқыланды.

Бұл шаралар қазақстандық стипендиаттар үшін білім беру және зерттеу мүмкіндіктеріне қолжетімділікті кеңейтуге, сондай-ақ Ұлыбритания мен Қазақстан университеттері арасындағы ғылыми байланыстарды нығайтуға бағытталған.