МӘЖІЛІСТЕ «БОЛАШАҚ» БАҒДАРЛАМАСЫНЫҢ ҚҰҚЫҚТЫҚ МӘРТЕБЕСІ ТУРАЛЫ ЗАҢ ЖОБАСЫ ҰСЫНЫЛДЫ

Мәжілістің жалпы отырысында депутат Болат Керімбек премьер-Министрдің орынбасары Тамара Дүйсеноваға депутаттық сауал жолдап, «Болашақ» бағдарламасының болашағы туралы мәселе көтерді.

Депутат Болат Керімбектің ойынша, бір-екі адамның жағымсыз әрекеттерінен мыңдаған адамға жол ашқан бірегей мемлекеттік бағдарламаны жабу деген дұрыс емес.

«Осы күнге дейін Болашақ бағдарламасы бойынша он екі мыңнан астам маман даярланды. Олар рейтингі жоғары оқу орындарының ғылыми дәрежесін алды. Әлемнің жетекші компаниялары мен университеттерінде ғылыми және өндірістік тағылымдамалардан өтті. Бағдарлама аясында ауыл жастарына, мемлекеттік қызметшілерге, ғылыми және педагогикалық қызметкерлерге әлемнің ең мықты университеттерінде білім алуға зор мүмкіндік берілді», - дейді депутат.

Депутат «Болашақ» түлектері республиканың экономикасына аса қажетті мамандар екенін жеткізді.

«Бүгінде болашақ түлектері Президент аппаратынан бастап барлық маңызды мекемелер мен ұлттық компанияларда қызмет етіп жүр. Мәселен, Болашақ бағдарламасының түлектері, мәселен, хирург Мыңжылқы Бердіқожаев ми тамырларына жоғарғы технологиялық ота жасайтын санаулы дәрігерлердің бірі. Ол осы уақытқа дейін алты мыңнан астам ота жасады. Сонымен қатар, Медет Махамбет жетпістен аса бірегей операцияның жаңа әдіспен құлаққалқанын қалпына келтірген болатын. Бұл бұл бір ғана медицина саласындағы оң тәжірибе. Басқа салаларда мұндай жетістікке жеткен білікті, жоғары мамандар жетерлік», - деді Болат Керімбек.

Қорыта келе, депутаттар Үкіметтен келесі шараларды қолға алуды ұсынды:

1. Болашақ бағдарламасы көптеген заң аясындағы актілермен реттелгендіктен, ол өз кезегінде құқықтық қиындықтарды тудыруда. Сондықтан Болашақ бағдарламасының құқықтық мәртебесін арнайы заң аясында реттеуді;
2. Шетелдерде қорғалған диссертациялардың электронды банкін жасау қажет. Бұл ғылыми жұмыстардың ашықтығын қамтамасыз етеді;
3. Тиісті мемлекеттік орган стипендиаттарға ел экономикасына қажетті тақырып бойынша ғылыми жұмысын жазуға тапсырыс беру қажет және оған кураторлық жасау керек;
4. Оқуға құжат тапсыруды, кепілдікке қойылған мүлікті тіркеуді, тіркеуден шығаруды цифрландыру қажет.

Депутаттық сауалды мәжіліс депутаттары М. Башимов, К. Авершин, С. Нұртаза, М. Рожин, Т. Адамбеков, Н. Тау қолдады.