UNIVERSITY OF SHEFFIELD — ИНЖЕНЕРЛЕРДІ ДАЯРЛАУ САЛАСЫНДАҒЫ КӨШБАСШЫ

2024 жылдың 24 қазанында Астанада Халықаралық бағдарламалар орталығының өкілдері Шеффилд университетінің құрылыс инновациялары профессоры Кипрос Пилакуутас пен аға оқытушы Маурицио Гваданьинимен кездесті. Шетелдік университет өкілдеріне орталық басқаратын бағдарламалар таныстырылды.

Кездесуде «Болашақ» бағдарламасы мен ғылыми тағылымдамалар аясындағы ынтымақтастықты одан әрі дамыту мәселелері талқыланды. Инженерлік зерттеулер, тұрақты технологиялар, жасанды интеллект және биомедициналық инженерия салаларындағы серіктестікті дамытуға, сондай-ақ бірлескен зерттеу жобаларын құруға ерекше назар аударылды.

Құрылыс инновациялары профессоры Кипрос Пилакуутас:

«Халықаралық бағдарламалар орталығымен ынтымақтастық біздің университеттер арасындағы ғылыми серіктестікті нығайтудың маңызды қадамы болып табылады. Бірлескен зерттеулер мен білім алмасу студенттер мен жалпы ғылым үшін елеулі нәтижелер береді деп сенеміз.»

1905 жылы негізі қаланған Шеффилд университеті QS World University Rankings халықаралық рейтингінде 104-орында, THE 2025 әлемдік рейтингінде 98-орында (Ұлыбритания бойынша 9-орын) және Uni Compare 2023/24 деректеріне сәйкес Ұлыбритания бойынша 2-орында тұр. Әлем бойынша 300 000-нан астам түлегі бар университет ғылыми зерттеулер саласында көшбасшы болуды жалғастырып, халықаралық рейтингтердегі көшбасшылық позицияларын растауда.

Қазіргі уақытта «Болашақ» бағдарламасы бойынша Шеффилд университетінде оннан астам қазақстандық студент оқуда, ал тағы оннан астам адам мониторингте тұр.

Кездесу барысында инженерлік және ғылыми салалар бойынша бағдарлама қатысушыларының санын көбейту жоспары белгіленді, сондай-ақ «Болашақ» бағдарламасының жеңілдетілген санаттары мен ғылыми тағылымдамалар бойынша шақырулар беру туралы келіссөздер жүргізілді.

Шеффилд университеті 10 000-нан астам ағаш өсетін кампусымен танымал, ал оның Студенттік одағы алты жыл қатарынан елдегі үздік деп танылды. Сонымен қатар, Шеффилд әлемдегі ең үздік студенттік қалалар рейтингінде (2022) 4-орында және Шотландия Корольдік банкінің индексі бойынша Ұлыбританиядағы студенттерге ең қолжетімді қалалардың арасында 3-орында тұр.

Университеттің инженерлік факультетінде 370-тен астам оқытушысы бар 4 академиялық мектеп бар және онда 6700-ден астам студент білім алады.

Зерттеу бағыттары аэроғарыштық инженерияны, автоматты басқаруды, азаматтық құрылысты, биомедициналық инженерия мен робототехниканы қамтиды. Университет сутегі энергетикасы және цифрлық өндіріс сияқты жаңа технологияларды белсенді түрде дамытуды жалғастыруда.

Бұл кездесу қазақстандық студенттер мен ғалымдар үшін халықаралық білім алмасу және әлемдік аренада бірлескен зерттеулер жүргізу мүмкіндіктерін нығайта отырып, жаңа перспективалар ашуда.

Суреттер: Әлішер Қадышов