UNIVERSITY OF WARWICK-КЕ САПАР

Уорик университеті – Ұлыбританияның ең беделді университеттерінің бірі, ол QS 2025 әлемдік рейтингінде 69-орынды және THE рейтингінде 106-орынды иеленген. Жақында өткен сапар барысында Халықаралық бағдарламалар орталығының басқарма төрайымы Әлия Оспанова қазақстандық студенттерді қолдауға бағытталған ынтымақтастық шарттарын талқылау үшін университет өкілдерімен маңызды кездесулер өткізді.

Әлия Оспанова академиялық мәселелер жөніндегі директор Ли Гриффин, халықаралық ынтымақтастық және стратегиялық даму жөніндегі директор Салли Смит, маркетинг және студенттерді тарту жөніндегі директор Кейт Валевска және халықаралық ынтымақтастық жөніндегі менеджер Кейт Уистонмен кездесті. Кездесу барысында Әлия Оспанова жетекші әлемдік университеттермен ынтымақтастықты одан әрі кеңейтудің маңыздылығын атап өтіп, бұл «Болашақ» бағдарламасы бойынша қазақстандық студенттер үшін оқу ақысын тікелей жеңілдету, ғылыми тағылымдамаларды дамыту және жеңілдікті санаттағы студенттерді қолдау есебінен көбірек мүмкіндіктер туғызатынын айтты.

«Уорик сияқты университеттермен серіктестікті кеңейту қазақстандық студенттер үшін жаңа мүмкіндіктер ашады. Біз сапалы білім беріп қана қоймай, студенттеріміздің ғаламдық аренада өздерін көрсетуге жағдай жасауға тырысамыз. Ғылыми тағылымдамалар мен оқу ақысын жеңілдету – осы жолдағы маңызды қадамдар», – деп атап өтті Әлия Оспанова.

Сапар барысында ерекше назар Уорик университетінің бірегей академиялық бөлімі – ғылым, технология және бизнес арасындағы ынтымақтастық пен инновация саласының көшбасшысы болып табылатын Warwick Manufacturing Group (WMG) орталығына аударылды. 37 жылдан астам уақыт бойы WMG электрификация және автономды жүйелер сияқты маңызды салаларда серпінді технологияларды әзірлеу орталығына айналды.

Орталық Jaguar Land Rover, Network Rail және Dyson сияқты жаһандық компаниялармен белсенді түрде ынтымақтасады, бұл студенттерге тәжірибеден өтуге және заманауи жобаларға қатысуға мүмкіндік береді.

WMG орталығы бірнеше зерттеу орталықтарын қамтиды, соның ішінде:

• Ұлттық автомобиль инновациялық орталығы (National Automotive Innovation Centre, NAIC) – электромобильдер мен тұрақты көлік технологияларын әзірлеуге маманданған жетекші орталық. NAIC Jaguar Land Rover және Tata Motors сияқты серіктестермен тығыз байланыста жұмыс істейді, инженерлік мамандықтағы студенттерге жетекші автомобиль компанияларында тәжірибе алуға мүмкіндік береді.
• Энергетикалық инновациялар орталығы (Energy Innovation Centre, EIC) – энергия сақтау саласындағы озық зерттеулермен айналысады. Орталық Nissan және Jaguar Land Rover сияқты ірі серіктестермен жұмыс істейді, электромобильдер мен тұрақты технологиялар үшін инновациялық шешімдер әзірлейді.

WMG күндізгі және сырттай оқу бағдарламаларын, соның ішінде студенттерді оқу мен жұмысты қатар алып жүретін Degree Apprenticeships форматтарын ұсынады.

Бағдарламалар автомобиль жасау, машина жасау және инженерия менеджменті бағыттарын қамтиды. Уорик университеті Ұлыбританияның Ұлттық киберқауіпсіздік орталығы және GCHQ тарапынан «Киберқауіпсіздік саласындағы зерттеулердің артықшылықтар орталығы» ретінде танылды.

Инновациялық бағдарламалар арасында денсаулық сақтау және технологиялар саласындағы болашақ мамандарды даярлайтын цифрлық денсаулық сақтау бойынша BSc сияқты бірегей курстар бар. Уорик университетінде жүргізілетін зерттеулердің 92%-ы Зерттеу жетістіктерінің құрылымы (Research Excellence Framework, REF) нәтижелері бойынша халықаралық деңгейде озық деп танылды.

Маңызды бағыттарға жаңартылатын энергетика, биомедициналық инженерия және урбанистика жатады. Бұл салаларда жетекші зерттеу орталығы ретінде Warwick Manufacturing Group (WMG) ерекше рөл атқарады. Қазіргі уақытта Уорик университетінде «Болашақ» бағдарламасы бойынша 19 стипендиат білім алуда. Жалпы, серіктестік басталғалы бері университеттің 422 түлегі «Болашақ» стипендиясының иегері атанды.

Сапар студенттермен кездесумен аяқталды, онда Әлия Оспанова стипендиаттар үшін цифрлық платформаларды жетілдіру және жағдайды жақсарту бағытындағы бағдарламаның өзгерістерімен таныстырды. Сөз сөйлеу аяқталғаннан кейін студенттердің сұрақтарына жауап берілді.

Кездесу барысында ғылыми зерттеулерді кеңейту және негізгі мәліметтерге қол жеткізу үшін мемлекетпен ынтымақтастық мүмкіндіктері, стипендияны көтеру мәселелері, процедураларды одан әрі жеңілдету және іріктеу конкурсына өзгерістер енгізу, оның ішінде ашықтық пен объективтілікті күшейту мәселелері де талқыланды.